不祥の子、まだ生きるの証拠
Saturday, 14 June 2008
-
我甚麼都不是，就是我
今日心情好差，勉強要形容的話，又唔係唔開心，有種鬱鬱不歡的感覺
阿Sam上黎屋企拎野，見到我間房有包煙，問我「你仲有食煙咩？」
我答「我係一直都無食煙，前排有食，用黎祭祀自己」
Sam答「痴線～你又唔係唔食唔得，你搞乜鬼呀？」
事實上，我又真係short short地的喎...
阿Sam走左之後，我係房內點了支煙，都係等佢燒0既多，吸0既少
睇住D煙一路往上飄，一個人靜靜地思考
或者我真係比較鐘意一個人無拘無束，或者我真係對人際關係比較不擅長
自己一個人的話，可以乜都唔駛理，唔駛將D空餘時間派俾其他人
但事實上呢？我咪又係為左維持一D關係而作出必需的應酬？
朋友用起上黎真係幾好用，唔同能力，唔同用途，叫到就有，所以，我亦不介意幫朋友，留人情
雖然，早幾日真係「死左都無人知」呢樣，琴日俾朋友忽視左 (其實只係個朋友善忘...)，有D唔開心
最記得老細教過一樣野 --「呢個世界唔會無左邊個唔得」
人總會覺得想被別人所需要的吧？
那，我還有甚麼價值呢？
1) 朋友的好幫手？ -- 你係一件非常好用的工具
2) 家中的好兒子？ -- 你別死，死了父母養大你就蝕本，邊個養佢地
3) 公司中的好員工？ -- 你係傭兵，收買了你的時間，你就要工作
有這些理由不就夠了？仲去諗乜野「我做D乜至會有人認同？有人會望多我一眼？」
「我做緊乜野，你根本唔知道，不如話，你有無真正看過我一眼呢？」
坐在鋁窗框上，吹風的感覺真好
然而，風，吹得猛，煙，散去了
祭祀完畢
Wednesday, 11 June 2008
-
抱恙
星期一夜晚係屋企，突然間個人頭暈身慶，個人好滾，同肚瀉，開頭以為自己只係有少少中暑同食D野唔乾淨所以肚痛，食左兩粒退燒藥就去訓覺
第二朝如常起身返工，個人都有D腳浮浮，不過照樣可以返工，跟住迫巴士去火車站，點知一向搭開的特別班次火車開走左，諗住知自己唔妥，俾多少少錢想坐頭等，又係無位坐，於是去返一般車卡同人迫
迫得兩迫，架車又焗，去到大學站已經頂唔住，未到火炭站就已經全個人標冷汗濕哂同企唔穩，但又無地方渣扶手柱，想走去門邊襟緊急制叫月台助理接我都行唔到過去
於是係火炭站落車，走去搵月台助理，話自己好辛苦，想搵地方休息，佢地的左我上職員室休息，跟住打左電話返公司請假同交待埋D工作，打左電話俾屋企人，訓左一陣有足夠體力走至行出去搭的士返屋企
返到屋企，個人更加辛苦，發燒最高去到39.2度，個肚又痛，訓左陣去睇醫生，醫生話可能係腸炎或慢性盲腸炎，如果第二朝都仲發燒，就最好去睇急症
今朝起身，仍然有發燒，但比昨日減低左，有少少想夾硬返工，阿爸見到我燙衫就制止我，見我仲有發燒，跟手就同左我上急症室，去到睇完醫生，打左支針，抽血同大便化驗，驗血又驗唔到有乜問題，至少唔係肝炎，醫生話應該只係比較嚴重的腸胃炎所以病到發燒，去拎埋藥之後返屋企休息同等大便化驗結果 (如果無事就唔會通知我)
打左支針，個人都無咁辛苦同有返多D體力，諗返轉頭可能早有預兆，前排情況都時好時壞，有段時間經常胃痛成日食唔到野，有時無乜事又一樣正常飲食
差不多10點返到屋企，打埋個電話返公司，send埋email，打埋呢篇xanga，體力又消耗得七七八八，又去訓覺
Friday, 06 June 2008
-
日本語Blog、スタート！
今年は、再び日本語文能力試 (三級) に挑戦のため、僕は、努力する必要があります。
そして、もう少し練習のチャンス、僕はこのBlogで日本語を使用です。
しかし、貴方が日本語を知らないの場合、僕に問いあわせ。
僕の日本語はまたまた未熟なんですけど、どんな不便ですが、申し上げございません。
Tuesday, 03 June 2008
-
琴晚同Raymond、文師兄、KK一共4個人去左都會海逸酒店食自助餐
呢間酒店Raymond早幾日同個客食完，連一向咀刁0既佢都話好掂，於是即刻拉隊去食
酒店環境都唔錯，有海景睇，唯獨燈光比較暗，想影相都比較難
食物嘛，又真係好多款式揀，Raymond最重點推介杏汁燉官燕、燕窩蛋tart、魚翅羹、乳豬、清蒸東星斑、北海道長蟹腳、芒果拿破崙、朱古力蛋糕等，尤其係個朱古力蛋糕，我足足食左三件...
每位$468再加一，某D信用card有9折，都覺得值得0既
再去食自助餐的話，我都係會去呢間～
Monday, 02 June 2008
-
閃光のサザビー
朋友真係認真好帶挈，之前叫佢幫我整左拎盒模型「沙剎比」(サザビー) 去電鍍，整到鬼死咁靚，搞到我連續兩晚12點至郁手，都要連夜將佢砌起至安樂
前文：話說最近出左隻Metallic Coating的版本 (MC版)，同舊款設計上無乜分別，但就貴好多 (普通版$400，MC版$800)，一怒之下，都係買盒普通版俾我朋友電鍍，應該會仲靚過MC版
MC版的樣貌：其實都只不過係做少少金屬色同光面
普通版... 更加慘不忍睹，瘀紅色的膠，而且膠質感非常重
既然係咁，我部電鍍版又如何呢？
朋友將D電鍍件整好個時，已經即時打俾我...
FD「喂，D件我想唔俾返你喎」
我「下？乜樹幹？」
FD「整得好鬼靚呀！我真想強搶左你囉，你大獲啦，你條友肯定唔駛訓都得喇！」
我「......」
星期六下晝，去朋友屋企拎左D件，又真係好靚，每件都好似鏡面咁，真係可以照到自己個樣 (睇見佢有俾佢勾魂的感覺... 同上次即時買部紅色電話的感覺差不多) 又急不及待砌即場左幾件
組裝完成，當然要影下相先，雖然仲有好多工夫要做，例如加貼紙、油線、補水口位等... 今鋪真係有排玩...
Friday, 30 May 2008
-
迷失與混亂
有無人教下我呢兩個詞語有乜分別?
Thursday, 29 May 2008
Wednesday, 28 May 2008
-
預感
今日有D心緒不寧，總覺得有D野會影響日常生活咁
希望我的直覺是錯的，沒甚麼事發生才好
Tuesday, 27 May 2008
-
格仔恐懼症
我0既恐懼症又多一樣，今次認真騎哩，叫做格仔恐懼症
每日對住千幾個格仔的圖係度畫呀畫，油顏色，真係見到格仔都驚...
hikaluu
-
- Country: Hong Kong
- Gender: Male
- Member Since: 4/15/2006
Chatboard (0)